البنات هم ملائكة البيت .. والطف الكائنات .. وأمهات المستقبل .. ومربيات الأجيال
هبة الرحمن لكل أم
علشان كده لازم ناخد بالنا واحنا بنربى بناتنا .. ونتجنب اى سلبية ممكن تأثر على حياة البنت وتكوين شخصيتها فى المستقبل
واحنا بنقدم لك أم مجموعة من النصائح والتوجيهات الإيجابية وبرضه بنوجهكم على بعض السلبيات علشان تأخد بالها منها :
1- اهمال مشاعرالبنت من طفولتها ... خاصة لو في أطفال غيرها .
مثلا لوكسلتى تسرحى شعر بنتك كل يوم وتعمليه على أشكال جميلة هيتلف ويدبل وزميلتها هيتريقوا عليها ويسخروا منها والأمهات التانيه هتعيب عليكي وبنتك هتشوف نفسها قليلة ومش واثقة من نفسها.
كذلك مشاعر طفلتك محتاجة لرعاية باستمرار وحنان, وعطف , ورقة مشاعر, واحتواء علميها تكون ملكة بحنانك ورقتك . والا هتتقطع من جواها حزن وحيرة وهتفقد ثقتها بنفسها.
2- قربيها منك وحسسيها انها مهمة عندك وكبيرة في عينك حسسيها انك معتزة بيها وفخورة انها بنتك.
متربطيش حبك ليها بأنها تسمع كلامك الأول وتعمل اللى تقوليلها عليه
لا انا بحبك لانك بنتي حبيبتي ..... وتاكدي قد ما تسقيها حنان هتديكي في كبرك باذن الله .
3- عامليها كاخت كبرى ليها تفضفض معاها اه لكن بتسمع كلامها وتحترمه وتقدره .
4- خلي لها هدف في الحياة من صغرها .... واتكلمي معاها وناقشيها خلي شخصيتها تنضج وتعرف ان في لها حضن كبير وعقل بيستوعبها .
5- خلي للبنت اللي على طول بتساعدك الاحترام والتقدير من اخواتها .... علميهم زي مابتتعب معاهم يقدروها ويحترموها ....ونوعي المكافاة بين مادي ومعنوي.
6- ازرعي فيها حب الخير والبهجة والسرور علميها التفاؤل وازاي تفيض بيه على اللي حواليها .علميها القناعة والرضا وحب الخير للجميع والحياء .
7- لو هيا الكبيرة اوعي تسرقي طفولتها وتعتبريها خادمة لاطفالك الأصغر .... مش ذنبها انها اتولدت الأول ..... اه علميها تشيل مسئولية بس بحدود .... حقها تمارس رياضة وتلعب وتكتشف كل شيء حواليها مش بس ترضع اخوها وتغير له وتنضف لك البيت.ولو عملت كده لازم تشجعيها وتكافئيها وتميزيها بينك وبينها على مجهودها معاكي.
8- اوعي تصدي بنتك او تجرحيها قدام الناس خليها دايما بنتك اللي بتفتخري بيها .
9- علميها ازاي تهتم بنضافتها الشخصية وملابسها وبشرتها وشعرها وشياكتها .
10- علميها تتكلم ازاي برقة وتاكل ازاي علميها الشياكة والرقي .
11- حفظيها القران وعلميها حب ربنا واغرسي فيها معنى الايمان ومراقبة الله علميها ( الله شاهدي , الله ناظري , الله رقيب علي ) علميها الالتزام بالاذكار الصباح والمساء وقبل دخول الحمام وقبل تغيير ملابسها وحصنيها دايما.
12- درجيها قبل البلوغ على الحجاب واحنا بنلبسه ليه .... وكلميها عن صحابيات الرسول وضحوا قد ايه في سبيل رضا الله علشان كده هنقتدي بيهم.... كلميها قبل البلوغ عن طبيعة مرحلة البلوغ والدورة وازاي نتطهر منها .... عرفيها ان ده شيء عادي متتكسفش منه واحتويها اوي في المرحلة دي .
13 – اسمعيها بقلبك وعقلك وحسي بيها وبدقات قلبها .
14- لما تبقى عروسة اختاريلها المناسب اسالوا عنه كويس في بيته وشغله واوعي تستعجلي عليها واحترمي احساسها بالرفض لعريس معين. اوعي تحسسيها انها اتخلقت علشان الجواز وبس وتعايريها انها اتاخرت في الجواز ولا عريس جه ومشى ولا كده .... خليكي حساسة قدري قد ايه بنتك بتتالم واوعي تزودي جرحها .... فهميها ان الحياة اتخلقنا فيها لاهداف كتير لازم نحددها ونسعى لتحقيقها الأمان مش بس في الزواج الى ان يأتي المناسب باذن الله.
15- وبعد زواجها باذن الله ربيتي وتعبتي مليتيها حنان ورقة وادب وتربية ودين وتحمل مسئولية واخترتيلها الزوج القوي الأمين كده جزاكي الله كل خير .بس اوعي تتدخلي في حياتها سيبيها تسعى وتجاهد وهتنجح باذن الله طالما نجحتي في تربيتها بجد.
وفي النهاية متنسيش ان بنتك دي اللي اتكونت في رحمك وتمنيتيها طول عمرك .... كنتي بتتمني تشوفيها قدام عينك وتليسيها وتدلعيها وتبسطيها بنتك المسئولة منك انتي وهتتسالي عنها يوم القيامة.اهي بين ايديكي انجحي في انك تقدميها كيان ناجح للمجتمع.
ليست هناك تعليقات :
إرسال تعليق